– Det er gjort mange studiar som viser at
trening er gunstig for danning av nye nerveceller i hjernen. Men det er få som
har samanlikna effekten av høgintensitetstrening med medium intens trening
direkte, seier professor Cecilie Morland ved Universitetet i Oslo.
– Det vanlege er å bruka enten det eine eller det andre.
Morland og kollegane har sett på danninga av nye nerveceller i to spesifikke område i hjernen.
Det eine er i hippocampus, senteret for læring og hukommelse, medan nervecellene frå det andre vandrar i andre delar av hjernen.
– Sjølv etter kort tid kunne vi sjå forskjell i effekten av høgintensiv trening samnlikna med mediumintensiv, seier Cecilie Morland.(Foto: Adam R. Babinski / UiO)
– Vi let to grupper mus trena i tre veker. Vanlegvis har vi late mysene trena i åtte veker, men denne gongen var vi òg interesserte i om vi kunne sjå nokon effekt etter kortare tid. Det kunne vi, sjølv etter såpass kort tid, seier Morland.
Manglar eit gen
– Den eine gruppa trente høgintensitivt i
tre veker, og dei andre mediumintensitivt. I begge gruppene såg vi som venta
auka vekst i nerveceller. Det har det jo som sagt vore forska mykje på før.
Det
forskarane fann som var nytt, var at høgintensitiv trening var meir effektivt enn
mediumintensitiv. Og altså på kortare tid enn dei tidlegare har vist.
Området som dannar nerveceller til
hippocampus, heiter den subgranulære sona (SGZ). Det andre området ventrikulær-subventrikulær
sone (V-SVZ).
I sistnemnde har gruppa til Morland tidlegare vist at mjølkesyre
regulerer danning av nerveceller.
– Denne gongen òg samanlikna vi mus som
manglar eit gen, med
vanlege mus. Genet dei mangla, gjer at dei ikkje har effekt av mjølkesyre i hjernen. Men vi såg ingen signifikant forskjell på dei to gruppene i SGZ,
som dannar nerveceller til hippocampus, fortel Morland.
Ho fortel at dei derimot ikkje såg nokon effekt i det andre området, V-SVZ, hjå mysene som mangla genet for effekt av mjølkesyre.
– Hjå
dei vanlege mysene vart det her òg danna fleire nerveceller ved høgintensiv
trening enn ved mediumintensiv.
Meir fokusert av trening
Fleire celler i senteret for læring og
hukommelse hjå mus er vel og bra, men mysene sitt åndsliv er så vidt vi veit
relativt fattig.
Spørsmålet er om vi vil sjå den same effekten hjå menneske, om
ein skal anbefala studentane om å intensivera treninga si før eksamen.
– Det er ikkje noko vi har sett på i denne
studien, men det er eit veldig viktig poeng. Trening har både korttids- og
langtidseffektar. Det vi har sett på i denne studien, er langtidseffektar av
regelmessig trening, seier Morland.
– Men det kan vera lurt å trena før eller
under eksamenslesinga, for ein korttidseffekt av trening er at en vert meir
fokusert etterpå. Den mest intensive treninga bør ein kanskje likevel planlegga
når ein skal ta. Det gjev ikkje særleg effektiv lesing om ein kollapsar på
sofaen når ein kjem heim.
