– Viss vi antar at 20 høgdemeter av det vi ser på videoane er korallar, betyr det at revet er minst 4000 år gammalt, anslår havforskar Tina Kutti.

Det nyfunne Bukkarevet ligg på terskelen til Hardangerfjorden, ved Bukkaskjeret. Det strekker seg fleire hundre meter i kvar retning, akkurat innafor grensene til Miljødirektoratet sitt foreslåtte Ytre Hardangerfjorden verneområde (sjå faktaboks).

Fann nåla i høystakken

Forskarane har lenge hatt mistanke om Bukkarevet etter sporadiske korallfunn i området. Både Kutti og andre har leita etter det før. Men i tussmørket på 150 meters djup ser kameraet berre nokre meter framfor seg. Det er med andre ord som med nåla i høystakken.

– Det var utruleg kjekt å endeleg få bekrefta at revet faktisk finst. Og det med eit kamera som eg stod på dekk og heldt i, seier Kutti.

Vil halde avstand mellom oppdrett og korall

Forskarane var på tokt for å lage ein «manual» for korleis oppdrettarar bør undersøke havbotnen før dei ber om å få plassere nye oppdrettsanlegg.

Botnen rett under anlegg, blir påverka av nedfallen skit og fôr frå merdane, eller innhegningane. Havforskarane vil generelt rå mot å plassere anlegg for nære korallar.

Veit lite om kystbotnen

– Funnet viser kor viktig det er å kartlegge unik natur på havbotnen. Vi har hatt fleire tokt i området, men ikkje sett dette revet før, seier Kutti.

Til havs samarbeider HI med Norges Geologiske Undersøking om systematisk havbotnkartlegging. Havbotnen langs kysten er lite kartlagt.

Når forskarane har analysert videomaterialet ferdig, vil dei legge funnet inn på Fiskeridirektoratet sitt sjøkart Yggdrasil.

Foreslåtte Ytre Hardangerfjorden verneområde

I juni 2019 tilrådde Miljødirektoratet å opprette Ytre Hardangerfjorden verneområde.

Den vestlege grensa går berre kilometer frå industribyen Leirvik på Stord. Hardangerfjorden i aust har høg tettleik av oppdrettsanlegg.

Målet er å gi ekstra vern til eit «representativt utval av marin natur».

Hindrar ikkje automatisk næringsverksemd, men vil krevje nøyare vurderingar.

Veks seint, og stort sett i Norge

Om lag ein fjerdedel av verdas kjente kaldtvasskorallar er i Norge.

Korallrev i Norge består av levande og døde augekorallar, Lophelia pertusa.

Oppvekst- og leveområde for andre artar.

Korallane veks seint, om lag fem millimeter i året.

Artikkelen er produsert og finansiert av Havforskningsinstituttet

Havforskningsinstituttet er én av 77 eiere av forskning.no.
Deres kommunikasjonsansatte leverer innhold til forskning.no. Vi merker dette innholdet for å tydelig skille formidling fra uavhengig redaksjonelt stoff. Her kan du lese mer om ordningen.

Fikk du med deg disse artiklene fra Havforskningsinstituttet?

Ti ting du ikke visste om is

Ny, sviande sjøanemone funnen i Hordaland

Velkommen til hvalenes forunderlige verden