Professor Gjert Knutsen er initiativtakaren til arbeidet med å leite etter bioaktive substansar i algar. Han driv dette arbeidet arbeidet saman med førsteamanuensis Svein Rune Erga, stipendiatar, hovudfagsstudentar og andre medarbeidarar. Til saman er det over tjue personar ved Universitetet i Bergen (UiB) som arbeider med materiale frå instituttet.
"Førsteamanuensis Svein Rune Erga (t.v.) og professor Gjert Knutsen ved Institutt for mikrobiologi er saman om arbeidet med å finne nye bioaktive stoff i algar."
Algeforskinga ved Institutt for mikrobiologi har potensiale på fleire felt. Fellesnemnaren er bioprospektering med marine cyanobakteriar og mikroalgar.
- Mikroalgar og blågrøne algar, det er det vi kan her hos oss, seier professor Gjert Knutsen.
- Eg trur dette har ei stor framtid i bioindustrien, men det krev at vi jobbar tett opp mot farmasøytiske bedrifter og liknande.
Praktiske føremål
Knutsen er oppteken av at forskinga skal kunne brukast til praktiske føremål.
- Det er jo kjekt å vere pionér, men samstundes er det viktig å kjenne at forskinga har ei retning, at vi kjem nokon veg. Det burde leggjast betre til rette med midlar til drift og utstyr, og ikkje minst med arbeidsmoglegheiter for stipendiatane og studentane våre etter at dei har avlagt graden, meiner han.
Kjerna i bioprospekteringa hjå algegruppa er isolering og identifisering av nye cyanobakteriar og mikroalgar frå norske fjord- og havområde, framstilling av reinkulturar, fotosyntetisk produksjon av biomasse, ekstraksjonar, og optimalisering av prosessledd og stoffutbyte. Stoffa blir testa på biologiske system, og dette skjer i samarbeid med fleire partnerar: Gruppa til professor Døskeland ved Institutt for anatomi og cellebiologi testar korleis algeprodukta kan hemme eller sette i gang apoptose, programmert celledød. Dette kan vise seg å vere effektivt i kreftbehandling.
Kreftsvulstar
I samarbeid med professor Knut-Jan Andersen ved Institutt for indremedisin testar hovudfagstudentar hemming av metalloprotease i prøver frå kreftsvulstar.
Professor Lars Haarr ved Avdeling for mikrobiologi og immunologi er, saman med ein hovudfagstudent, involvert i testing på herpesvirus.
Ved Institutt for mikrobiologi testar dei sjølve korleis algestoffa kan hemme bakterie- og soppvekst. Instituttet arbeider også med biologisk, fotosyntetisk hydrogenproduksjon frå marine mikroalgar.
Når ein har funne reine, bioaktive stoff, skal dei identifiserast av kjemikarar. Det skal gjerast i samarbeid med professor Leiv Sydnes ved Kjemisk institutt.
