Karbondioksid (CO2) kan bety langt meir for utviklinga av dykkarsjuke enn det ein hittil har tenkt. Det kan bety at yrkesdykkarar i framtida bør leggje opp arbeidet annleis enn i dag.
CO2 kan nemleg ha stor effekt på utviklinga av gassbobler i blodet, viser ein fersk doktorgrad ved Noregs veterinærhøgskole (NVH).
Dykkarsjuke kan oppstå hos både sports- og yrkesdykkarar dersom dykkaren gjennomfører ei for rask oppstigning, slik at nitrogenet i blodet ikkje rekk å bli oppløyst før personen når overflata.
Dykkarsjuke er ein smertefull tilstand som i verste fall kan vere livstruande.
Lokal produksjon av CO2
Så langt har ein diskutert nitrogen, helium og liknande gassar i forhold til dykkarsjuke. CO2 har vore ignorert, sidan denne gassen har ei særs god evne til å løyse seg opp og forsvinne raskt ut av kroppen.
Doktorgradsstudia til Henrik Rasmussen viser likevel at den CO2 som blir danna i blindtarmen hos mus og rotter, blir spreidd gjennom heile tarmveggen, slik at det oppstår overmetning av gass i lokale område av blindtarmen.
Studia viser vidare at når ein gir ultralydkontrastmidlar (som består av gassbobler som blir gitt intravenøst) til mus og rotter, så veks ultralydkontrastmidlane i tarmen på grunn av overmetning av gass, slik at dyra får skadar i blindtarmen og på levra.
Konsekvensar for Nordsjødykkarar?
Ut frå desse funna er det ikkje utenkjeleg at Nordsjødykkarar for eksempel, kan ha ein tilsvarande lokal produksjon av CO2 som påverkar danninga av gassbobler i blodet, og dermed kan føre til utvikling av dykkarsjuke.
Det kan tenkjast at yrkesdykkarar får ein lokal høgare produksjon av CO2 i delar av tarmkanalen eller i dei musklane som dei bruker mest.
Dersom det i tillegg er seismisk aktivitet i nærleiken, kan skadeverknadene av CO2 bli store, sidan sonare lydtrykk verkar sterkt på boblevokster i blodet.
Arbeidet er utført i samarbeid mellom forskarar frå GE Healthcare, Karolinska Instituttet, Stockholm, Rikshospitalet, Oslo og Gøteborg Universitet, Gøteborg.
Referanse:
Cand. med. vet. Henrik Rasmussen er tilsett i GE Healthcare (tidlegare Nycomed Imaging) og disputerte 20. september 2007 for Doctor philosophiae-graden ved Noregs veterinærhøgskole med avhandlinga:
” Local effects of metabolic gases on intravascular bubble growth. Studies on large intestinal disposition of CO2 of microbial origin and the effects on gas-carrier contrast agents in rodents”.