Liv Plassen presenterer ny kunnskap om den nordskandinaviske bresmeltinga etter siste istid i doktorgradsavhandlinga “Stratigraphy and sedimentary environment in North Norwegian and Spitsbergen fjords” som ho nyleg forsvarte ved Institutt for geologi, Universitetet i Tromsø.

Bresmeltingshistorie

Gjennom sitt doktorgradsarbeid har Plassen kartlagt og tolka høgoppløyselege akustiske data og borekjerner frå Andfjord-Vågsfjord-regionen og Ullsfjord i Nord-Norge, og Isfjorden på Spitsbergen, med spesiell vekt på bresmeltingshistorie, stratigrafi, sedimentasjonsmiljø og sedimentære prosessar.

Betre forståing

Ho har funne ut kor mykje, og kva slags sediment, som blei avsatt i dei undersøkte fjordane gjennom dei ulike tidsrom av bresmeltinga. Avhandlinga har bidratt til ei betre forståing av storskala sedimentære prosessar, samt utvikling av sedimentasjonsmiljø i nordnorske fjordar og fjordar på Spitsbergen.

Doktorgradsavhandlinga består av fire vitskapelege artiklar, der to er offentleggjort i internasjonale tidsskrift.